Ministria e Drejtësisë demanton njoftimin e Odës së Avokatëve për Marrëveshjen e lidhur me Republikën e Shqipërisë

Ministria e Drejtësisë ka demantuar deklaratën e Odës së Avokatëve të Kosovës, lidhur me Marrëveshjen e nënshkruar mes Kosovës dhe Shqipërisë për njohjen e të drejtës së ushtrimit të profesioneve të avokatit dhe ndërmjetësit në zgjidhjen e mosmarrëveshjeve.

Njoftimin e Odës së Avokatëve, Ministria e Drejtësisë e ka quajtur të pavërtetë dhe keqinformues.

“Për hirë të së vërtetës, Ministria e Drejtësisë njofton opinionin e gjerë publik se Oda e Avokatëve të Kosovës është ftuar dy herë radhazi për të qenë në takimet e planifikuara me palën nga Republika e Shqipërisë. Përkundër ftesave me shkrim ( datë 2 qershor 2023) dhe atyre me telefon, përfaqësues të Odës së Avokatëve të Kosovës, nuk kishin marrë pjesë në takimet e tilla punuese” thuhet mes të tjerash në reagimin e MD-së.

Ky është demantimi i plotë:

Ministria e Drejtësisë përmes këtij demanti, reagon ndaj Njoftimit të pavërtetë dhe keqinformues të Odës së Avokatëve lidhur me Marrëveshjen e nënshkruar në mes të Republikës së Kosovës dhe asaj të Shqipërisë “MARRËVESHJA PËR NJOHJEN E SË DREJTËS SË USHTRIMIT TË PROFESIONEVE TË AVOKATIT DHE NDËRMJETËSIT NË ZGJIDHJEN E MOSMARRËVESHJEVE”

Nga momenti i nënshkrimit të Deklaratës së Zotimit në mbledhjen e përbashkët të të dyja qeverive në vitin e kaluar, datë 22 qershor 2023, në asnjë moment nuk ka pasur ndonjë reagim apo kundërshtim nga asnjë akter për lidhjen e Marrëveshjes së tillë.

Për hirë të së vërtetës, Ministria e Drejtësisë njofton opinionin e gjerë publik se Oda e Avokatëve të Kosovës është ftuar dy herë radhazi për të qenë në takimet e planifikuara me palën nga Republika e Shqipërisë. Përkundër ftesave me shkrim ( datë 2 qershor 2023) dhe atyre me telefon, përfaqësues të Odës së Avokatëve të Kosovës, nuk kishin marrë pjesë në takimet e tilla punuese.