08:28 / E Premte, 30 Gusht 2019

Ministria e Financave alokon mjetet për KQZ-në

Ministria e Financave, me qëllim të interesit publik, dhe duke u bazuar në dekretin e presidentit të Republikës së Kosovës për caktimin e zgjedhjeve të parakohshme dhe duke u bazuar në nenin 15 paragrafi 2 të Ligjit të buxhetit ka marrë vendimin për ndarje të buxhetit për KQZ-në.

Këshilltari i ministrit të Financave, Lulëzim Rafuna i ka thënë KosovaPressit se gjatë  24 orëve të ardhshme mjetet pritet të dalin në llogarinë e KQZ-së, e cila kjo e fundit do t’i shfrytëzojë për organizimin e zgjedhjeve.

Të martën, KQZ-ja, në mbledhjen e saj kishte kërkuar 5 milionë e 698 mijë euro nga institucionet përkatëse për organizimin e zgjedhjeve.

Ndërsa, dje mbledhjen e paralajmëruar për orën 11:00, KQZ-ja nuk e ka mbajtur fare. Drejtues të KQZ-së paralajmëruan para dy ditësh se nuk do të marrin asnjë veprim për organizimin e zgjedhjeve pa para.

Ndryshe, Ministria e Financave kishte mbetur peng i Kushtetueses për një opinion se si të veprojë në këtë rast për shkak të gjendjes së krijuar që nga rënia e qeverisë Haradinaj.