Ministria e Mbrojtjes distancohet nga rasti i pjesëtarit të FSK-së që dyshohet për keqpërdorim seksual
Zëvendësministri i Mbrojtjes së Kosovës, Burim Ramadani ka reaguar në lidhje me dyshimet që një ish-pjesëtar i FSK-së ka keqpërdorur seksualisht të miturën në Gjilan.
Ai ka thënë se një rast i tillë është i papranueshëm dhe se ky rast nuk e përfaqëson shpirtin dhe integritetin e FSK-së.
Sipas Ramadanit tashmë gjithçka mbetet në dorën e drejtësisë në mënyrë që të merren masa në lidhje me rastin.
Postimi i plotë:
Me indinjim dhe keqardhje mësova mbi dyshimet që një pjesëtar i FSK-së ka kryer veprën penale keqpërdorim seksual i personave nën moshën 16 vjeçare.
Kjo është e papranueshme, e dënueshme dhe e patolerueshme.
Ky rast i dyshuar nuk përfaqëson shpirtin dhe integritetin e Forcës sonë!
Shpreh keqardhjen më të thellë për të dëmtuaren dhe familjen.
Gjithçka mbetet në dorën e drejtësisë dhe, në rast të vërtetimit të dyshimeve, inkurajoj gjyqësorin të ndërmerr veprimet më meritore në ndëshkim.
Deri në vendimin gjyqësor, të gjitha masat ligjore do të zbatohen.
/Indeksonline/