Ministria e Shëndetësisë premton rritje të buxhetit, për trajtimin e pacientëve me fibrozë cistike

Në kuadër të Konferencës së 12-të të Evropës Juglindore për Fibrozë Cistike, e cila po mbahet në Prishtinë nga 3 deri më 5 prill, Ministria e Shëndetësisë (MSH) premtoi rritje të buxhetit për barna, me qëllim zvogëlimin e barrës financiare për familjet e pacientëve me këtë sëmundje.

Sekretari i përgjithshëm i MSH-së, Naim Bardiqi, tha se shpenzimet që familjet mbulojnë nga xhepi për trajtimin e kësaj sëmundjeje janë të larta dhe se kërkesat për mbështetje financiare nga shteti janë legjitime.

“Pagesa nga xhepi për qytetarët tanë është rreth 40 për qind. Synimi i MSH-së është zvogëlimi i shpenzimeve nga xhepi i qytetarëve duke mundësuar një qasje universale. Kërkesa e Shoqatës më të drejtë për pacientët me fibroz cistike e kap shumën diku afërsisht rreth 10 milionë euro vetëm për produkte medicinale. Shuma, të cilën shteti e ndanë qoftë për skemën e barnave jashtëspitalore në listën e barnave esenciale, por edhe për barnat spitalore në total është rreth 65 milionë euro. Synimi i qeverisë është rritja e buxhetit për barna”, tha Bardiqi.

Udhëheqësja e CF Europe, Hilde De Keyser, e vlerësoi pjesëmarrjen e Ministrisë së Shëndetësisë në këtë konferencë si një hap të rëndësishëm drejt përmirësimit të kujdesit për pacientët.

“Unë gjithmonë them se këto konferenca janë në nivelin më të mirë kur të gjithë, çdo palë e interesuar, është e pranishme dhe është jashtëzakonisht e rëndësishme të kemi praninë e Ministrisë së Shëndetësisë këtu, sepse vetëm së bashku mund të bëjmë një ndryshim të vërtetë. Vetëm së bashku mund të përmirësojmë jetët e njerëzve me fibrozë cistike përtej kufijve dhe vendeve. Së bashku me ECFS, kemi punuar në Projektin Twinning, ku bashkojmë qendrat e trajtimit të fibrozës cistike dhe organizatat e pacientëve nga vende të ndryshme për të shkëmbyer përvoja, për të ndërtuar rrjete dhe për të kapërcyer sfidat, me të cilat përballen njerëzit me fibrozë cistike, duke siguruar kujdesin dhe trajtimin më të mirë të mundshëm për ata që kanë më shumë nevojë”, tha Drevinek.

Anëtari i Bordit të ECFS, Z. Pavel Drevinek, foli për rëndësinë e projekteve ndërkombëtare në mbështetje të trajtimit të pacientëve.

“ECFS, shoqata, është organizata ndërkombëtare e punonjësve të kujdesit shëndetësor, studiuesve dhe shkencëtarëve në fushën e fibrozës cistike dhe qëllimi i saj kryesor është përmirësimi i cilësisë së jetës së njerëzve me fibrozë cistike. Nga ky këndvështrim, shoqata drejton disa projekte shumë të rëndësishme, si Regjistri Evropian, rrjeti i qendrave të fibrozës cistike për të zhvilluar prova klinike, si dhe projektin Twining”, tha  Drevinek.

Ai shpjegoi se Kosova tashmë është pjesë e këtij projekti, duke bashkëpunuar me qendrën e specializuar në Holandë.

“Pra, çfarë është projekti Twinng? Është një program partneriteti midis dy qendrave të fibrozës cistike, zakonisht një nga Evropa Lindore dhe një nga Evropa Perëndimore, për të ndihmuar njëra-tjetrën dhe me qëllimin përfundimtar që asnjë punonjës shëndetësor dhe asnjë pacient të mos mbetet pas, duke siguruar akses në kujdes shëndetësor cilësor në të gjithë Evropën”.

Ndërsa, sipas të dhënave të prezantuara nga doktoresha Vlora Nimani, aktualisht në Kosovë janë të regjistruar 149 pacientë me fibrozë cistike, shumica e të cilëve janë fëmijë.

“Kemi grupmosha të ndryshme, 20 persona janë të rritur, pjesa tjetër janë fëmijë”, tha Nimani.