Ministrja Bajrami mori pjesë në përurimin e objektit të ri të çerdhes “Yllkat”, në Prishtinë

Ministrja e Arsimit, Shkencës dhe Teknologjisë, Hykmete Bajrami, ka marrë pjesë sot në përurimin e objektit të ri të çerdhes “Yllkat” në Prishtinë, ku ka shprehur kënaqësinë e saj që në ditën e parë të mandatit të ministres në këtë dikaster, e fillonte në mesin e fëmijëve të kësaj moshe.

“Fëmijët janë pjesa më e rëndësishme e shoqërisë sonë dhe për ta duhet të punojmë ditë e natë, jo vetëm ne që jemi të ndërlidhur me arsimin, por të gjithë dikasterët, në mënyrë që të përmirësojmë kualitetin e jetës së tyre”, tha ministrja Bajrami.

Ministrja e Arsimit përmendi analizat e ekspertëve që tregojnë se dy vjet të edukimit parashkollor ndikojnë në ngritje prej 40% të rezultateve në arsimin fillor dhe të mesëm. Prandaj, ajo theksoi se, prioritet i kësaj Qeverie është ngritja e kapaciteteve të tilla jo vetëm në Prishtinë, por në të gjitha komunat e Kosovës, në mënyrë që të ketë përfshirje sa më të madhe të fëmijëve në këtë nivel, i cili do të japë rezultate të mira në arsimimin e mëtejshëm.