“Minsk 2019” – Shqipëria zhgënjen në debutim, të gjithë sportistët humbin
Aventura e delegacionit kuqezi në Lojërat Olimpike Europiane “Minsk 2019” nuk ka nisur mirë. Të gjithë sportistët kuqezinj që kanë garuar sot janë mundur në duelet e tyre. Gjithsesi, lajmi i vetëm i mirë vjen për Kosovën, ku Majlinda Kelmendi fitoi medaljen e artë në peshën -52kg.
Të parët që garuan për Shqipërinë ishin qitësit Manuela Delilaj dhe Henri Rrufa, në garën 10m pistoletë ajër, ekipore miks. Dyshja kuqezi u klasifikua në vendin e 27-të, atë të fundit, duke grumbulluar 554 pikë. Për pasojë, qitësit kuqezinj u eliminuan që në start.
Today at the 2nd European Games of #Minsk, was the first #training of the Albanian team of #shooting! Go, go, go #Albania! @Minsk2019BY @Olympics #sport pic.twitter.com/fb4CFqQTkt
— KOKSH_NOCalbania (@NOCalbania) June 20, 2019
Boksieri Arjon Kajoshi garoi në peshën 75kg. Që në duelin e tij të parë, shkodrani është mundur 4-1 nga bjellorusi Vadzim Pankou. Katër gjyqtarë kanë vituar për bjellorusin (30-27, 29-28, 29-28 dhe 30-27), ndërsa një gjyqtar për Kajoshin (29-28). Kështu, aventura e shqiptarit është mbyllur shumë shpejt, pa lënë shumë gjurmë edhe pse stafi kuqezi ka protestuar për gjykim të njëanshëm, në favor të boksierit vendës.
Në sportin e judo, sportisti Indrit Çullhaj është mundur me “ippon” që në duelin e parë, atë ndaj sllovenit Adrian Gomboc, duke u eliminuar që në start. Sfida ishte e vlefshme për peshën -66kg.
Në judo ka triumfuar për Kosovën kampionia olimpike Majlinda Kelmendi, që garoi në peshën -52kg. Ajo i fitoi të 4 duelet e zhvilluara në këtë Olimpiadë Europiane, duke i dhënë Kosovës medaljen e parë të artë në histori në një event të tillë.
Në raundin e parë, Kelmendi mundi zviceranen Fabienne Kocher dhe më pas polaken Karolina Peenkoëska. Në gjysmëfinale, sportistja kosovare fitoi ndaj francezes Amandine Buchard, ndërsa në finale Kelmendi triumfoi ndaj ruses Natalia Kuziutina.
