Momentet e fundit të jetës së Princeshës Diana, rindërtimi i aksidentit që çoi në një nga tragjeditë më tronditëse mbretërore në histori

Është mesnata e 31 gushtit 1997 dhe Princesha Diana, e shoqëruar nga Dodi Fayed dhe shoqëruesit e tyre, po përgatitet të largohet nga hoteli Ritz në Paris për të udhëtuar distancën e shkurtër përmes kryeqytetit francez deri në apartamentin e Dodit në Champs-Elysees.

Princesha dhe djali i pronarit të Harrods, Mohamed Al Fayed, kanë kaluar pjesën më të madhe të verës së bashku në jug të Francës, duke çuar në shumë spekulime rreth natyrës së marrëdhënies së tyre. Jashtë hotelit Ritz, Princesha e Uellsit shoqërohet në Mercedes-Benz W140 të Dodit ndërsa nisen për në apartament.

Shoferi i Dodit, Henri Paul, është i dehur dhe nget shpejtësinë nëpër rrugët e Parisit. Duke drejtuar makinen me mbi 60 mph, ai hyn në tunelin Pont de l’Alma dhe përplas një Fiat Uno të bardhë. Henri humbet kontrollin e makinës dhe përplaset me një shtyllë, duke shkaktuar një nga tragjeditë më tronditëse mbretërore në histori.

Princesha Diana së bashku me Dodin dhe Henrin vdiqën në aksident. Ndërsa truproja e Dodit, Trevor Rees-Jones, u plagos rëndë. Ai ishte i vetmi person në makinë që mbante rrip sigurimi.

Vdekja e papritur e Dianës, vetëm 36 vjeç, tronditi Britaninë dhe botën. Funerali i Dianës më 6 shtator 1997 u ndoq nga rreth 32 milionë njerëz në Britani, që përbënte mbi gjysmën e popullsisë së përgjithshme në atë kohë, dhe e bëri atë një nga ngjarjet më të shikuara në historinë e Mbretërisë së Bashkuar. Ndërsa në nivel global, rreth 2.5 miliardë njerëz e ndoqën ngjarjen, duke e konsoliduar tragjedinë si një nga ngjarjet më tronditëse të shekullit të 20-të.