Mosha mesatare e policëve mbi 47-vjet, për gjashtë muaj policinë e braktisën 35 punonjës

Policia e Kosovës sot ka shpallur konkurs për pranimin e zyrtarëve policorë sipas kushteve të parapara të konkurrimit. Ndonëse nuk është dhënë numri se sa do të pranohen, në konkurs thuhet se mosha duhet të jetë nga 18 deri në 30 vjeç.

Arsyeja e shpalljes së këtij konkursi është mungesa e punonjësve në këtë institucion, ku disa policë janë pensionuar e disa kanë dhënë dorëheqje për shkak të pagave të ulëta.

Imer Zeqiri, kryetar i Sindikatës së Policisë së Kosovës, në një prononcim për IndeksOnline ka thënë se vetëm në gjashtë muajt e fundit, Policinë e kanë braktisur 35 punonjës, ku shumica prej tyre të pakënaqur me pagat.

Ai ka thënë se mosha mesatare e pjesëtarëve të Policisë së Kosovës është mes 47 dhe 48 vjet, moshë kjo tejet e lartë për institucionin dhe krahasuar me vendet e rajonit.

Vitin e kaluar ishte bërë një përpjekje për miratim të Ligjit për pensionimin e parakohshëm i cili ligj do të ndikonte me përtëritjen e këtij institucioni dhe në këtë mënyrë do të ofroheshin shërbime më të mira për qytetarët.

“Pensionimi i parakohshëm do të ndikonte në përtëritjen e organizatës pasi që do të punësoheshin gjenerata të reja ndërsa për të pensionuarit do të kishin një tretman më dinjitoz. Me përtëritjen e organizatës, PK-ja do të ishte në gjendje që të ofronte shërbime më të mira të sigurisë për qytetarët e vendit”, kishte thënë për media ish drejtori i policisë, Rashiq Qalaj.

Është raportuar se 528 zyrtarë policorë janë me sëmundje kronike dhe ata janë të detyruar të dalin në punë.

Rikujtojmë se në Shqipëri, mosha mesatare e policëve është 44.1 vjeç, sipas “balkanweb”, ndërkohë në Serbi më 2020 ishte 41.3 vjeç./IndeksOnline/