MPJD-ja reagon pas heqjes së targave të veturave: Jemi në kontakt me policinë sllovene

Ministria e Punëve të Jashtme dhe Diasporës ka bërë me dije se është në dijeni për heqjen e targave të disa veturave me regjistrimin e Republikës së Kosovës, në Slloveni.

Përmes një njoftimi zyrtar, nga MPJD-ja pohojnë se janë në kontakt të vazhdueshëm me Ambasadën e Kosovës në Slloveni dhe me policinë sllovene, për çdo zhvillim të ri, shkruan IndeksOnline.

“Bazuar në raportimet e deritanishme, dyshohet se disa veturave u janë hequr targat. Ambasada është në kontakt të vazhdueshëm me disa prej shtetasve të prekur dhe u ka rekomanduar atyre që të mos i lëvizin veturat pa njoftuar paraprakisht Policinë e Sllovenisë dhe pa marrë një raport zyrtar” thuhet në njoftimin e MPJD-së.

Ky është njoftimi i plotë:

Ambasada e Republikës së Kosovës në Slloveni njofton se menjëherë pas përfundimit të ndeshjes së futbollit Slloveni–Kosovë, ka pranuar disa thirrje telefonike nga shtetas të Republikës së Kosovës, të cilët kanë raportuar mungesën e targave të veturave të tyre.

Bazuar në raportimet e deritanishme, dyshohet se disa veturave u janë hequr targat. Ambasada është në kontakt të vazhdueshëm me disa prej shtetasve të prekur dhe u ka rekomanduar atyre që të mos i lëvizin veturat pa njoftuar paraprakisht Policinë e Sllovenisë dhe pa marrë një raport zyrtar.

Ambasada e Republikës së Kosovës në Slloveni po merret me rastin dhe po bashkërendon veprimet me autoritetet përkatëse.

Ne mbetemi në komunikim të vazhdueshëm me shtetasit tanë dhe me Policinë e Sllovenisë për çdo zhvillim të ri.