Murati pas pezullimit të tenderit 137-milionësh të KEK-ut: OSHP-ja, institucion i kapur nga opozita
Tenderi për “Rehabilitimin dhe Modernizimin e Njësisë A3” në termocentralin “Kosova A”, me vlerë 137,340,000 Euro, është pezulluar dje nga Organi Shqyrtues i Prokurimit (OSHP), vetëm një ditë para afatit përfundimtar për dorëzimin e ofertave.
Për këtë çështje ka shkruar ministri në detyrë, Hekuran Murati, i cili OSHP-në e quajti “institucion të kapur nga opozita.
“Sa herë që KEK-u tenton të regjenerojë kapacitetet, disa nga opozita mobilizohen me të gjitha institucionet e kapura që të pengojnë çfarëdo pune që do rriste sigurinë e furnizimit apo edhe kapacitetet gjeneruese nga KEK-ua. Rastin më të fundit e keni tenderin për rehabilitim të bllokut A3, për të cilin Hykmetja që nga dita e parë ka sulmuar ndërmarrjen. Sot, Hykmetja i qenka gëzuar lajmit se tenderi qenka pezulluar me urdhër të OSHP-së, me arsyetimin se tenderi ka kritere diskriminuese për kompanitë lokale (cila kompani lokale ka kapacitet për rindërtim të termocentraleve se?)”, shkroi Murati në Facebook.
Për këtë pezullim, Murati akuzoi “opozitën” dhe tha se tashti do të ketë zvarritje në rehabilitimin e “Bllokut A3”.
“Pra në vend se puna të ecte dhe “Blloku A3” të rehabilitohej sa më shpejt, do të kemi zvarritje të reja, sepse opozitës i pengon çfarëdo rritje e kapaciteteve publike”.
“Ngjashëm e patën sulmuar edhe kontratën me General Electric për ndërrim të turbinave të TC “Kosova B1” dhe “B2”, projekt që rrit jetëgjatësinë e dy blloqeve dhe shton kapacitetin gjenerues. Ngjashëm e kanë bllokuar edhe marrëveshjen me EIB për 100 MW energji solare në KEK. Ngjashëm e patën bllokuar edhe projektin e Bilfinger për rehabilitimin e komplet blloqeve të TC “Kosova A”, madje kjo ka ndodhur kur Hykmetja ka qenë ministre. Pra, sa herë që KEK-u tenton të rrisë kapacitetin furnizues, i shihni se si bëjnë çmos që ta pengojnë e vonojnë, këta që vazhdimisht pretendojnë se ua qajnë hallin qytetarëve. Vlerësojeni vetë të dashur qytetarë se kush po i shërben mafisë energjetike?”, shkroi në Facebook , Murati.
