Mustafa: Për marrëveshje me Serbinë, duhet ndihma e Gjermanisë dhe Francës

I pari i Lidhjes Demokratike të Kosovës, Isa Mustafa thotë se procesi i Berlinit shtyn përpara rrjedhat e bashkëpunimit të BE’së me vendet e Ballkanit Perëndimor dhe se takimi i nesërm është i dobishëm për të dinamizuar këtë proces.

Në një publikim në rrjetin social “Facebook”, Mustafa ka shkruar se Kosova ka nevojë për përkrahje të Gjermanisë dhe Francës.

Por, që vendit i duhet edhe partneritet i fortë me SHBA’të dhe Mbretërinë e Bashkuar për t’u arritur marrëveshja përfundimtare me Serbinë.

Sipas tij, Kosova e ka më lehtë kur udhëheqësit e saj janë më të qartë në qëndrime.

Shkrimi i plotë i Mustafës në Facebook:

Procesi i Berlinit, i idejuar nga Kancelarja Merkel, ka shtytë përpara rrjedhat e bashkëpunimit të BE-së me vendet e Ballkanit Perëndimor dhe, po ashtu, ka krijuar rrethana të reja të komunikimit ndërmjet këtyre vendeve. Takimi i nesërm në Berlin është i dobishëm për të dinamizuar këtë proces.

Jo vetëm Kosova dhe Serbia, por edhe vendet e tjera të Ballkanit Perëndimor kanë shumë punë për tu evropianizuar institucionalisht.

Kosova ka nevojë për përkrahje të Gjermanisë dhe të Francës, tani si vende boshte të BE-së. Sikurse që i nevojitet partneritet i fortë me SHBA-të dhe Mbretërinë e Bashkuar për të arritur Marrëveshjen përfundimtare me Serbinë.

LDK-ja, si parti më e madhe në vend, është shprehur qartë për nevojën e një marrëveshjeje të qëndrueshme, sikurse që ka qenë dhe është e qartë se nuk do të përkrahë asnjë marrëveshje e cila prek kufijtë e Kosovës, shtetësinë e shpallur me Deklaratën e Pavarësisë të 17 shkurtit 2008, karakterin unitar të vendit dhe që është e rrezikshme për regjionin dhe më gjerë.

Kur Kosova është e qartë në qëndrimet e saj, dhe mendoj se pjesa dërmuese e subjekteve janë të qarta, e ka më leht edhe në Berlin edhe në Ëashington, ua lehtëson punën edhe miqëve tanë. IM