16:14 / E Mërkurë, 03 Tetor 2018

Ndalohet për 48 orë një person në Viti, dyshohet se përdhunoi nusen e djalit

Prokuroria Themelore në Gjilan ka ndërmarrë aktvendim për ndalim në kohëzgjatje prej 48 orësh për një rast dhunimi i cili ndodhi në komunën e Vitisë.

Sipas Prokurorisë në Gjilan, ekziston dyshimi i bazuar se në fund të muajit shtator 2018, i dyshuari XH.I., e ka ngacmuar dhe shfrytëzuar seksualisht të dëmtuarën 18 (tetëmbëdhjetë) vjeçare – bashkëshorten e djalit të tij, në atë mënyrë që me forcë dhe pa pëlqimin e saj, e detyron të kryejë marrëdhënie seksuale, në shtëpinë e tyre.

Dyshohet që, i njëjti këto veprime i ka ndërmarrë duke shfrytëzuar mungesën e anëtarëve tjerë të familjes, duke përfshirë edhe mungesën e bashkëshortit të të dëmtuarës.

“Prokuroria Themelore në Gjilan, menjëherë pas njoftimit të këtij rasti, ndaj të dyshuarit ka nxjerrë aktvendimin mbi ndalim në kohëzgjatje prej 48 orësh, për shkak të dyshimit se ka kryer veprën penale ‘’Dhunimi’’, nga neni 230 paragrafi 1 lidhur me paragrafin 3 nën paragrafi 3.3 të Kodit Penal të Republikës së Kosovës.Lidhur me këtë çështje, Prokuroria ndaj të dyshuarit në Gjykatën Themelore në Gjilan, do të ushtrojë kërkesën për caktimin e paraburgimit, si dhe do të ndërmerren të gjitha veprimet e tjera hetimore për ndriçimin e këtij rasti”, thuhet në komunikatën për media./Indeksonline/