Në këtë shtet, artistët do të marrin 325 euro nga shteti çdo javë

Irlanda po punon për një strategji që do t’u sigurojë artistëve të ardhura javore, me shpresën se kjo do të zvogëlojë nevojën e tyre për të bërë punë të tjera dhe do të rrisë kreativitetin e tyre.

Nisma BIA (Të ardhurat bazë për artet) do t’u sigurojë 2000 artistëve që banojnë në Irlandë një të ardhur javore prej 325 eurosh. Plani është hartuar në cikle trevjeçare.

Ministri i Kulturës Patrick O’Donovan zbuloi se kjo është strategjia e parë e tillë në botë.

“Për herë të parë në historinë e shtetit, tani kemi, në mënyrë të përhershme, një strukturë të të ardhurave bazë që do të revolucionarizojë vërtet dhe, në shumë aspekte, do ta dallojë Irlandën nga vendet e tjera për sa i përket mënyrës se si e vlerësojmë kulturën dhe kreativitetin”, vazhdoi ai.

Strategjia e përhershme u parapri nga një program pilot që u zhvillua nga viti 2022 deri në vitin 2025 për të ndihmuar artistët gjatë mbylljeve të shkaktuara nga pandemia e koronavirusit.

Një program pilot në Irlandë përzgjodhi rastësisht 2,000 artistë nga 8,000 aplikantë. Studimi zbuloi se programi uli gjasat e privimit të detyruar, si dhe nivelet e ankthit dhe varësisë së artistëve nga të ardhurat shtesë./Indeksonline/.