Në mes të ditës tentohet të dhunohet i mituri 11 vjeçar nën Urën e Gurit në Prizren

Sot gjatë ditës në orën 13:15 në qendër të Prizrenit ka pasur tentativë për dhunim seksual ndaj një fëmije të moshës 11 vjeçare nga komuniteti RAE. Viktima e rastit, e cila është fëmijë që kërkon lëmoshë, është joshur nga i dyshuari me një pije.

Por fatmirësisht, ai ka shpëtuar për shkak se disa dëshmitarë e kanë parë ngjarjen.

E për këtë ka reaguar edhe asamblisti i Lëvizjes Vetëvendosje në Prizren, Ilir Gashi, i cili ka qëlluar që të jetë edhe dëshmitarë.
Ai ka shkruar në rrjetin social Facebook se fëmija kishte shpëtuar falë një reagimi të një familje nga Prishtina që jeton në perëndim, e falë një nëne të guximshme.

“Sot në mesditë, në zemër të Prizrenit – nën Urën e Gurit, një person ka tentuar ta dhunoj apo ta shfrytëzoj seksualisht një të mitur 11 vjeçar të komunitetit RAE. Rasti ishte zbuluar falë reagimi të një familjeje nga Prishtina që jeton në perëndim, falë një nëne të guximshme, fatmirësisht” shkroi ai.

Tutje ai tregon detaje se i dyshuari ka ikur nga vendi i ngjarjes, ndërsa të njëjtën gjë ka tentuar që ta bëjë edhe viktima por ishte ndaluar nga dëshmitarët deri sa erdhi policia.
“I dyshuari i ka ikur nga duart e shokut tim i cili më priste te Ura. Pasi që edhe viktima i mitur synonte të ikte nga vendi i ngjarjes, së bashku me shokun tim siguruam që viktima të mos largohet deri sa erdhi patrulla policore” shkroi Gashi në Facebook.

Ai tutje shtoi se policisë ia kanë dhënë përshkrimin e personit të dyshuar.