Nënkryetarja e LDK-së: Nga Osmani duam siguri se do të ketë rol unifikues

Lidhja Demokratike e Kosovës po zhvillon takime me kandidaten për presidente Vjosa Osmani, për t’u siguruar nga ajo se do të luajë rol unifikues dhe përfaqësim të popullit sa më të mirë siç kërkohet nga Presidenti, ka thënë nënkryetarja e LDK-së, Shqipe Mjekiqi .

Ajo tha se në parti janë duke punuar për të arritur një qëndrim të përbashkët rreth zgjedhjes së numrit një të vendit, por ka thënë se një vendim i tillë do të merret pas një takimi tjetër me Osmanin.

“Lidhja Demokratike e Kosovës, kryetari i saj Lumir Abdixhiku është duke zhvilluar takime bashkë me nënkryetarët me Osmanin për të diskutuar, për t’u siguruar se Osmani do të luajë një rol unifikues dhe do të përfaqësojë interesat e popullit më së miri ashtu siç kërkohet nga pozita e presidentit, kushdo qoftë ai”.

“Ka mendime të ndryshme. Mirëpo kjo është e natyrshme në secilën kryesi të partive, në secilin këshill të përgjithshëm, ka mendime të ndryshme. Ajo për çfarë po punojmë ne tani është për të arritur një qëndrim unifikues pavarësisht zërave të ndryshëm. Që të dalim me një qëndrim të përbashkët, por kjo varet edhe nga disa takime të paktën edhe një tjetër që pritet të ketë lidershipi ynë me Osmanin”, tha Mjekiqi, për EO-në.

Ajo tha se LDK-ja do të jetë opozitë konstruktive ku do të kritikojnë kur është e nevojshme dhe do të bashkëpunojnë për çështje të interesit nacional.

“LDK-ja është në opozitë meqenëse ka shënuar një rezultat jo aq të mirë në zgjedhjet e fundit. Do të jetë pjesë e opozitës, duke luajtur një rol konstruktiv, duke shqyrtuar të gjitha propozimet, draftligjet të cilat dalin nga Qeveria e Kosovës. Do të kritikojmë në raste kur kjo është e nevojshme dhe natyrisht do të luajë një rol mbështetës në ato momente kur kërkohet. Ka çështje me rëndësi për Kosovën që kërkojnë bashkëpunim ndërpartiak ose mbipartiak”, tha ajo.

Mjekiqi ka thënë se beson që kryetari i ri i LDK-së do të sjellë ndryshime në parti, duke shtuar se arsyeja e pranimit të pozitës së nënkryetares në këtë parti ka qenë lidershipi i Abdixhikut.

“Besoj se Abdixhiku do të sjellë ndryshim në parti, kjo është një prej arsyeve që më ka shtyrë mua t’i bashkohesha Lidhjes Demokratike pikërisht në këtë kohë. E kam pasur këtë mundësi që t’isha pjesë e Lidhjes, por mendoj se tashti hapësira për të kontribuar jo vetëm për mua, por edhe të tjerë të cilat janë bashkuar kohët e fundit dhe të cilët do të bashkohen në ditët e muajt në vijim. Pra, është një mundësi për të kontribuar duke e ditur që lidershipi i ri i prirë nga Abdixhiku do të sjellë më të vërtetë ndryshime jo të shpejta, por ndryshime afatgjatë të mira për skenën politike në Kosovë”, ka thënë nënkryetarja e LDK-së.

Ajo ka theksuar se si nënkryetare do të angazhohet së bashku me ekipin për një rikthim të partisë, duke shtuar se bashkëpunimi me strukturat në komuna do të forcohet.

“Si nënkryetare e Lidhjes Demokratike të Kosovës fillimisht do të punojë bashkërisht me ekipin që të rikthejmë LDK-në në pozicionin që e ka pasur dhe me synimin që të marrim një mbështetje me të madhe të rinisë në Kosovë, duke qenë se përbën përqindjen më të madhe të strukturës së popoullësisë në Kosovë. Si nënkryetare po ashtu do të punoj ngushtë me bashkëpunëtorët tanë që i kemi në strukturën komunale të Lidhjes Demokratike, pra nëpër komuna të ndryshme të Kosovës në mënyrë që të forcojmë komunikimin me ta, sepse ky komunikim ka çalu në një kohë të caktuar. Duke i funksionalizuar këto struktura natyrisht ne arrijmë me kuptuar më mirë se çka kërkon elektorati në nivelet më të ulta e jo vetëm të marrim qëndrimet e elektoratit në një nivel qendror. Do të mundohem që të forcojmë më tepër bashkëpunimin ndërkombëtar të cilin e kemi vendosur me partitë tona simotra në vendet evropiane dhe gjithashtu edhe me grupin e partive në Parlamentin Evropian dhe të gjitha partitë e tjera të qendrës së djathtë”, ka thënë Mjekiqi.

Shqipe Mjekiqi është zgjedhur nënkryetare e LDK-së, në Kuvendit zgjedhor të kësaj partie, më 14 mars.