Netanyahu e kërcënon Hezbollahun nëse përfshihet në luftë

Kryeministri i Izraelit, Benjamin Netanyahu e ka paralajmëruar Hezbollahun nëse vendos të hyjë në luftë.

Netanyahu ka thënë se Hezbollahu do të gjymtohet “nga një forcë që as nuk mund ta imagjinojë” nëse vendos t’i bashkohet luftës kundër Izraelit.

“Kjo do të jetë shkatërruese për shtetin e Libanit dhe Hezbollahun, por ne jemi të përgatitur për çdo skenar”, ka thënë Netanyahu gjatë një vizite që u ka bërë trupave ushtarake në veri të dielën.

Në një video që është publikuar shihet teksa Netanyahu u thotë ushtarëve se “ne jemi në betejë për jetën, për shtëpinë tonë. Kjo është lufta”.

Hezbollahu është një lëvizje islamike e mbështetur nga Irani me një nga forcat paraushtarake më të fuqishme në Lindjen e Mesme.

Grupi, i cili ka bazën e tij kryesore në kufirin Izrael-Liban, mund të bëhet një lojtar i egër në luftën Hamas-Izrael dhe të ndezë një konflikt më të gjerë rajonal.

Konflikti që filloi me sulmet vdekjeprurëse të Hamasit ndaj Izraelit – për të cilin zyrtarët izraelitë thonë se vranë 1,400 njerëz – tashmë ka pasur pasoja të gjera në Lindjen e Mesme dhe ka shkaktuar përçarje diplomatike dhe protesta në mbarë botën.

Pasojat janë të dukshme në kufirin Liban-Izrael, ku Hezbollahu dhe Izraeli janë përfshirë në përleshje e cila aktualisht është vetëm zhurmë e heshtur, duke e vënë kështu të gjithë rajonin në tehun e thikës.

Mbetet e paqartë nëse Hezbollahu do të ndërhyjë në luftën Hamas-Izrael në emër të palestinezëve. Nëse Hezbollahu përfshihet në luftë, ai do të hapte një konflikt shumëfrontesh, duke e shtyrë Lindjen e Mesme në një territor të paeksploruar me pasoja të paparashikueshme.