Nisma apel kryetarëve të degëve: Mobilizohuni anekënd vendit
NISMA Socialdemokrate ka mbajtur sot një takim me anëtarët e kryesisë dhe kryetarët e degëve, ku është diskutuar rreth përgatitjeve për zgjedhjet e parakohshme për Kuvendin e Kosovës.
Kryetari i Nismës Socialdemokrate, Fatmir Limaj, ka kërkuar nga drejtuesit e degëve që të mobilizojnë dhe angazhojnë strukturat e Nismës anekënd vendit, në mënyrë që subjekti i tyre të dalë sa më i fuqishëm nga ky proces i parakohshëm zgjedhor.
Gjithashtu, kryetari Limaj, drejtuesve të degëve u ka thënë se, ruajtja dhe mbrojtja e vlerave tona kombëtare është vetë programi ynë si Nismë dhe në funksion të kësaj duhet që të gjithë të angazhohemi maksimalisht.
NISMA Socialdemokrate është duke u angazhuar në terren që të garojë e vetme në këtë proces zgjedhor dhe zëri i saj të jetë edhe më i fuqishëm në Parlament dhe çdo institucion që e udhëheq.
Në këtë takim, anëtarët e kryesisë dhe drejtuesit e degëve të Nismës u dakorduan që në varësi të rrethanave të këtij procesi zgjedhor, të vendoset se si do të konkurrojë Nisma në këto zgjedhje e vetme apo në ndonjë koalicion parazgjedhor.
