Një i vdekur dhe dy të plagosur rëndë nga një sulm me thikë, në Sydney

Një person humbi jetën dhe dy të tjerë mbetën të plagosur rëndë pas një sulmi me thikë që tronditi këtë mëngjes Sydneyn, në një zonë të populluar të qytetit.

Sipas një njoftimi zyrtar nga policia e shtetit të Uellsit të Ri Jugor, shërbimet e emergjencës u thirrën rreth orës 10:00 të mëngjesit në një periferi perëndimore të metropolit australian, pasi një burrë sulmoi me thikë disa persona dhe më pas u largua nga vendngjarja. Ngjarja ndodhi në një lagje të frekuentuar, duke shkaktuar panik mes banorëve dhe kalimtarëve.

Ekipet mjekësore të urgjencës ua dhanë ndihmën e parë tre personave me lëndime të rënda. Megjithatë, një burrë nuk arriti t’u mbijetonte plagëve dhe u shpall i vdekur në vendngjarje. Lajmi u konfirmua nga oficeri i lartë i policisë, Simon Glaser, i cili dha detaje paraprake mbi incidentin.

Dy viktimat e tjera, një burrë 22-vjeçar dhe një grua 47-vjeçare, u transportuan me urgjencë në spital dhe ndodhen në gjendje kritike për jetën. Autoritetet shëndetësore kanë bërë të ditur se po u ofrohet trajtim intensiv mjekësor.

Policia bëri të ditur se i dyshuari u arrestua pak kohë më vonë gjatë një operacioni në zonë. Sipas Glaser, autori i dyshuar është një person i njohur për policinë për vepra të mëparshme penale dhe ka një histori të problemeve të shëndetit mendor. Ai pritej të dilte para gjykatës më vonë gjatë ditës.

Hetimet vijojnë, ndërsa autoritetet theksojnë se është ende herët për të përcaktuar motivin e sulmit, i cili paraprakisht dyshohet të ketë qenë i rastësishëm.