Një James Bond i ri po përflitet, ja kush është aktori favorit për rolin legjendar

Spekulimet rreth aktorit australian Jacob Elordi po rriten me shpejtësi, teksa mediat aludojnë se ai mund të zëvendësojë Daniel Craig në rolin legjendar të agjentit 007.

28-vjeçari ka qenë në qendër të vëmendjes së publikut kohët e fundit për interpretimin e tij si Heathcliff në filmin Wuthering Heights, i drejtuar nga Emerald Fennell, si dhe për nominimin e tij për Oscar për performancën në filmin e Guillermo Del Toro, Frankenstein.

Sipas disa raportimeve mediatike, Elordi thuhet se ka pasur një takim me regjisorin Denis Villeneuve, i cili do të drejtojë filmin e ardhshëm të Bond, Bond 26, prodhuar nga Amazon/MGM. Një burim i famshëm i thashethemeve, DeuxMoi, pretendon se aktorit i është ofruar roli i famshëm i spiun-it britanik.

Nëse ky spekulim rezulton të jetë i saktë, Elordi do të bëhej australiani i dytë që luan James Bond, pas George Lazenby, i cili interpretoi rolin në filmin On Her Majesty’s Service të vitit 1969.

Opinioni është i ndarë: The Independent e cilësoi Elordin si një zëvendësues të shkëlqyer për Craig, duke përmendur karizmën dhe magnetizmin e tij, ndërsa The Telegraph kritikon lartësinë e tij, duke e quajtur “superspiuni i ri me lartësi të frikshme”.

Mes fansave, ka gjithashtu debate mbi origjinën e aktorit, disa duke argumentuar se James Bond duhet të mbetet britanik. Emra të tjerë të përfolur për rolin përfshijnë Idris Elba, Henry Cavill, Callum Turner dhe Aaron Taylor-Johnson.

Kur u pyet për këto spekulime, Elordi komentoi: “Kjo është e bukur… Më pëlqen që njerëzit ndoshta duan të më vendosin në filmat e tyre. Kjo më bën shumë të lumtur.”