Një pauzë një javore nga rrjetet sociale sjell këto efekte pozitive në shëndetin mendor
Reduktimi i përdorimit të rrjeteve sociale për një javë rezultoi në ulje të ndjeshme të ankthit, depresionit dhe pagjumësisë tek pjesëmarrësit e një studimi të ri.
Përdorimi i gjerë i rrjeteve sociale shihet si një faktor potencialisht i dëmshëm për shëndetin mendor, pasi mund të zëvendësojë përvojat reale, të cilat zakonisht mbrojnë mirëqenien psikologjike, shkruan burimi Medical News Today.
Studimi, i publikuar në “JAMA Network Open”, përfshiu 373 të rinj nga 18 deri në 24 vjeç. Pjesëmarrësit raportuan 16% ulje të simptomave të ankthit, 24.8% ulje të simptomave të depresionit dhe 14.5% ulje të pagjumësisë.
Ky efekt u vërejt, ndër të gjitha platformat e përdorura, përfshirë Facebook, Instagram, Snapchat, TikTok dhe X. Instagram dhe Snapchat ishin platformat më të përdorura gjatë periudhës së studimit, ndërsa TikTok, Facebook dhe X u vizituan më pak nga pjesëmarrësit.
Pjesëmarrësit u lejuan të reduktonin kohën e ekranit sipas dëshirës së tyre, dhe rezultatet sugjerojnë se kufizimi i përdorimit të rrjeteve sociale mund të ketë përfitime të dukshme për shëndetin mendor.
Këto gjetje mbështesin bisedën në vazhdim mes ekspertëve mbi ndikimin e kohës së kaluar në ekran dhe përdorimit të rrjeteve sociale tek të rinjtë dhe adoleshentët.
Një meta-studim i publikuar në qershor 2025 gjeti prova të gjera që pushimet nga rrjetet sociale mund të jenë përgjithësisht të dobishme për mirëqenien psikologjike.
