“Një përgjegjësi dhe nder i madh”, Liri flet për filmin e Reçakut dhe bashkëpunimin me De Niron

Këngëtari kosovar, Liri, po merr pjesë në një nga projektet më të mëdha kinematografike që po zhvillohen aktualisht në Kosovë, filmin që trajton Masakrën e Reçakut.

Në një prononcim ekskluziv për Indeksonline, ai ka ndarë emocionet dhe përjetimet e para nga xhirimet që kanë nisur ditëve të fundit.

I pyetur se si po e përjeton pjesëmarrjen në një film kaq të rëndësishëm ai tha:
“Pjesëmarrja në këtë film është një ndjenjë e veçantë përgjegjësie dhe nderi. Reçaku është një plagë e hapur në historinë tonë, dhe fakti që kam mundësi të jap kontributin tim në rrëfimin e kësaj historie më emocionon dhe më motivon jashtëzakonisht shumë. Jam shumë e kujdesshme që çdo detaj të jetë sa më i vërtetë dhe me respekt për viktimat dhe familjet e tyre”.

Prania e aktorit botëror Robert De Niro ka shkaktuar jehonë të madhe në publik, ndërsa Liri e konsideron këtë një moment të rrallë në karrierën e tij.

“Është një eksperiencë që ndodh vetëm një herë në jetë. Të punosh pranë një figure të kalibrit të Robert De Niros është frymëzuese — nga profesionalizmi i tij, mënyra si e qaset çdo skenë, deri te thjeshtësia dhe mirësjellja në set. Është një shkollë më vete dhe po më ndihmon të rritem edhe më shumë si artist”.

Liri thekson se atmosfera gjatë xhirimeve ka qenë e jashtëzakonshme, duke e bërë eksperiencën edhe më të veçantë.

“Ajo që më ka bërë më shumë përshtypje është profesionalizmi dhe përkushtimi i ekipit, sidomos Krass Production, të cilët po bëjnë një punë jashtëzakonisht të madhe për ta sjellë këtë histori me dinjitet dhe nivel ndërkombëtar. Gjithashtu, mikpritja dhe emocionet e njerëzve në vendet ku kemi xhiruar kanë qenë të jashtëzakonshme, dhe kjo e bën gjithë eksperiencën edhe më të veçantë”./Indeksonline/