NPB nënshkruan marrëveshje me Fakultetin e Inxhinierisë së Ndërtimit, hap i madh për studentët
Ndërmarrja Publike Banesore ka nënshkruar marrëveshje me Fakultetin e Inxhinierisë së Ndërtimit në Universitetin e Prishtinës “Hasan Prishtina”, për të zhvilluar dhe nxitur bashkëpunimin në nivele të ndryshme.
Sipas njoftimit të NPB-së, bashkëpunimi do të fokusohet në fushën e arsimit, shkencës dhe projekte të tjera të përbashkëta.
Marrëveshja është nënshkruar mes kryeshefit ekzekutiv të NPB-së, Artan Berisha, dhe Dekanit të Fakultetit të Inxhinierisë, Florim Grajçevci.
“Ndërmarrja Publike Banesore do të përfshihet aktivisht në këtë bashkëpunim, duke angazhuar studentë dhe mësimdhënës për të siguruar një përvojë të pasur praktike për studentët dhe për të kontribuar në zhvillimin e studimeve të inxhinierisë së ndërtimit në fusha të caktuara” thuhet mes të tjerash në njoftim.
Ky është njoftimi i plotë:
Marrëveshja e nënshkruar midis Kryeshefit Ekzekutiv të Ndërmarrjes Publike Banesore (NPB) Artan Berisha dhe Dekanit të Fakultetit të Inxhinierisë së Ndërtimit në Universitetin e Prishtinës “Hasan Prishtina” (FIN-UP) Florim Grajçevci shënon një hap të rëndësishëm drejt bashkëpunimit dhe avancimit të arsimit dhe shkencës në fushën e ndërtimit.
Ky partneritet synon të zhvillojë dhe të nxisë bashkëpunimin në nivele të ndryshme, duke përfshirë arsimin e lartë, shkencën, dhe projekte të përbashkëta. Nënvizohet se bashkëpunimi do të fokusohet në ngritjen e arritjeve profesionale të studentëve të FIN-UP, duke përfshirë punën e tyre në projekte të përbashkëta dhe në realizimin e nevojave ndërinstitucionale.
Ndërmarrja Publike Banesore do të përfshihet aktivisht në këtë bashkëpunim, duke angazhuar studentë dhe mësimdhënës për të siguruar një përvojë të pasur praktike për studentët dhe për të kontribuar në zhvillimin e studimeve të inxhinierisë së ndërtimit në fusha të caktuara.
Më tej, ky partneritet thekson edhe një projekt hulumtues të financuar nga Universiteti i Prishtinës, i cili synon vlerësimin dhe sanimin e objekteve ekzistuese në zonën e Ulpianës në Prishtinë. Kjo nxitje e projektit hulumtues do të sjellë një kontribut të rëndësishëm në fushën e inxhinierisë së ndërtimit dhe do të forcojë lidhjen midis universitetit dhe sektorit publik.
Ky bashkëpunim ndërmjet NPB dhe FIN-UP shpreh përkushtimin për zhvillimin e arsimit dhe shkencës në fushën e ndërtimit dhe thekson rëndësinë e partneriteteve të tilla për avancimin e njohurive dhe praktikave në këtë fushë të rëndësishme.
