Nuhiu për gjykimin në Hagë: Burimi i dëshmive duhet të provohet

Zëvendësministri i Drejtësisë në Maqedoninë e Veriut, Agim Nuhiu, ka shkruar rreth gjykimit që po mbahet në Hagë kundër ish-udhëheqësve të Republikës së Kosovës, njëherësh ish-drejtues të UÇK-së, ku ka theksuar se Prokurori i Specializuar nuk do ta ketë aq lehtë përballjen me të akuzuarit në Hagë!

Zv.ministri Agim Nuhiu ka cekur se “burimi i dëshmive duhet të provohet, sepse shpeshherë burimi i provave e ndryshon cilësinë. Nëse nuk provohet burimi i provës konkrete, atëhere do të kemi papërdorshmërinë e asaj prove”.

Ja postimi i z. Agim Nuhiu:

Në betejën juridike, Prokurori i Specializuar nuk do ta ketë aq lehtë përballjen me të akuzuarit në Hagë!

Akuza për ekzistencën e qëllimit të përbashkët kriminal nuk do të mbetet nën hijen e veprimeve hetimore dhe ndjekjes penale te ndermarrë nga ana e Prokurorit te Specializuar. Ajo duhet të argumentohet gjatë zhvillimit të procedurave para Dhomave te Specializuara me prova! Prezentimi i provave do të bëhet në prani të të akuzuarve me qëllim të kundër argumentimit. Po edhe burimi i dëshmive duhet të provohet, sepse shpeshherë burimi i provave e ndryshon cilësinë e saj. Nëse nuk provohet burimi i provës konkrete, atëhere do të kemi papërdorshmërinë e asaj prove. Gjykimi per përgjegjesi penale nuk është aq i thjeshtë!