“Nuk ka vend për kriminelë lufte”: Ministrat e Jashtëm të BE-së balancojnë me kujdes për samitin Trump-Putin në Budapest
Mundësia që presidenti rus, i kërkuar nga Gjykata Ndërkombëtare Penale (GJNP) për krime lufte, të hyjë në territorin e BE-së, ka dominuar takimin e ministrave të jashtëm të hënën, shkruan Euronews.
Mundësia që presidenti rus, i kërkuar nga Gjykata Ndërkombëtare Penale (GJNP) për krime lufte, të hyjë në territorin e BE-së, ka dominuar takimin e ministrave të jashtëm të hënën, shkruan Euronews.
Evropianët vazhdojnë të përballen me idenë e një samiti të mundshëm midis presidentit amerikan Donald Trump dhe presidentit rus Vladimir Putin në Budapest, një ngjarje që do të shënonte herën e parë, që nga fillimi i pushtimit të plotë të Ukrainës, që Putini, një njeri nën sanksione dhe me urdhër arresti, do të shkelte në tokë evropiane.
Ndërsa u mblodhën të hënën në Luksemburg për një takim, ministrat e jashtëm të Bashkimit Evropian ecën në një vijë të hollë mes mbështetjes për diplomacinë e Trumpit dhe mbrojtjes së integritetit të Gjykatës Ndërkombëtare Penale (GJNP), ku Putini kërkohet për deportimin dhe transferimin e dhjetëra mijëra fëmijëve ukrainas.
Hungaria mbetet ende palë e GJNP-së deri sa të hyjë në fuqi tërheqja e saj vitin e ardhshëm. Vendi ka shpërfillur tashmë një urdhër arresti për kryeministrin izraelit Benjamin Netanyahu.
“Nuk është mirë të shohësh që një person me urdhër arresti (të lëshuar) nga GJNP-ja po vjen në një vend evropian”, pranoi Përfaqësuesja e Lartë, Kaja Kallas. “Pyetja është nëse do të ketë ndonjë rezultat nga kjo. Këtë duhet ta shohim, si do të zhvillohen gjërat në Budapest, pasi kemi qenë shumë të qartë që Rusia negocion vetëm kur është nën presion. Kështu që, shpresojmë që Presidenti Trump ta bëjë këtë”.
Ministri i Jashtëm i Lituanisë, Kestutis Budrys, ishte më i drejtpërdrejtë në vlerësimin e tij:
“Nuk ka vend për kriminelë lufte në Evropë”, tha ai në mbërritje.
Sipas Budrys, përpjekjet diplomatike të Trumpit mund të kombinohen me luftën e Gjykatës Ndërkombëtare Penale kundër mosndëshkimit, edhe pse kjo e fundit varet nga vullneti i qeverive për zbatimin e arrestimeve.
“I vetmi vend për Putinin në Evropë është Haga, para tribunalit, jo në ndonjë nga kryeqytetet tona”, shtoi ai.
Ndërkohë, shtetet anëtare po shqyrtojnë lehtësimin e ndalimit të fluturimeve ruse për të lejuar vizitën e mundshme, ndryshe Putini mund të hyjë në Hungari përmes Ballkanit Perëndimor.
Ministri francez Jean-Noël Barrot e quajti “të dobishme” që SHBA vazhdon kontaktet me Moskën, por paralajmëroi se prania e Putinit në territorin e BE-së “ka kuptim vetëm nëse çon në një armëpushim të menjëhershëm dhe pa kushte”.
“Koha nuk është në favor të Putinit”, shtoi ai, duke iu referuar ndikimit të sanksioneve të BE-së.
