13:11 / E Premte, 05 Mars 2021 / OSH

Oda e Hotelerisë: Sallat e dasmave të hapen në prill

Oda e Hotelerisë e Kosovës, ka paralajmëruar mosrespektim të masave eventuale  të cilat kufizojnë punën e tyre, duke kërkuar që sallat e dasmave të hapen në fillim të muajit prill.

Në një konferencë shtypi të mbajtur të premten përfaqësues të kësaj ode kanë thënë se do t’u  kundërvihen këtyre masave, duke paralajmëruar edhe protesta.

“Në bazë të informatave që kemi, janë paralajmërimet që do shtrëngohen masat dhe me mbledhjen e Këshillit… jemi dakorduar që edhe ne t’u kundërvihemi këtyre masave nëse miratohen”, tha kryetari Hysen Sogojeva. Ai ka kërkuar që sallat e dasmave që janë të mbyllura që nga  marsi i vitit të kaluar të hapen nga muaji prill.

“Nga terreni që kemi qenë në shumë rajone kemi marrë aprovimin e tyre që këto masa që ne i marrim kanë me qenë të realizueshme për gjitha bizneset, andaj ne kërkojë që të mos ketë kufizim të orarit, sallat e dasmave që nga marsi i vitit të kaluar nuk kanë punuar nga java e prillit të nisin punën në bazë të rregullave”, tha  Sogojeva.

Ai  tha se reagimet do t’i kenë shumë të ashpra, që nga protestat, por edhe në mënyra të tjera dhe që këtë herë nuk do lëshojnë pe.

Ndërsa, Skënder Thaçi, nënkryetar i Odës tha se janë lodhur nga krejt këto masa dhe mbyllja nga ana e institucioneve.

“Jemi bërë tabelë shitëse e institucioneve dhe ne jemi kontribuues dhe po mbushim buxhetin e shtetit tonë. Është fyerje për ne aplikimi i këtyre masave. Ne nuk jemi vatër e infeksionit dhe boll na keni marrë frymën”, tha Thaçi. Paralajmërimin për shtrëngim të masave e ka kundërshtuar edhe  Shoqata e Gastronomëve të Kosovës.