Osmani: Asnjë shoqëri s’është e lirë nëse gratë mbesin mbrapa

Në edicionin e sivjetëm të Javës së Gruas, të organizuar nga Instituti Kombëtar Demokratik (NDI), presidentja e Kosovës, Vjosa Osmani, ka dhënë një mesazh të fuqishëm për barazi dhe drejtësi gjinore.

Përmes një postimi në Facebook, Osmani theksoi rëndësinë e përfshirjes së plotë të grave në shoqëri.

“Asnjë shoqëri nuk mund të jetë vërtet e lirë, e drejtë apo e barabartë, nëse gjysma e popullit të saj mbetet mbrapa”, ka shkruar ajo.

Javën e Gruas, NDI-ja e organizon çdo vit me qëllim fuqizimin e rolit të grave në politikë, vendimmarrje dhe shoqëri.