Osmani konfirmon gatishmërinë e Kosovës për bashkëpunim të thellë me Qeverinë e Gjermanisë

Ditën e sotme e para e vendit, Vjosa Osmani ka pritur në një takim drejtorin për Ballkanin Perëndimor në Ministrinë e Punëve të Jashtme të Gjermanisë, Michael Reiffenstuel

Në këtë takim temë diskutimi ka qenë formimi i institucioneve dhe pozita e Kosovës në arënën ndërkombëtare.

‘’Presidentja e Republikës së Kosovës, Vjosa Osmani, priti sot në takim drejtorin për Ballkanin Perëndimor në Ministrinë e Punëve të Jashtme të Gjermanisë, Michael Reiffenstuel, me të cilin bisedoi për zhvillimet e fundit në vend dhe rajon, me fokus te zhvillimet rreth konstitutimit të parlamentit. Po ashtu, u diskutua për forcimin e mëtutjeshëm të marrëdhënieve dypalëshe, bashkëpunimin ekonomik dhe fuqizimin e pozitës së Kosovës në arenën ndërkombëtare’’ thuhet në njoftim

Po ashtu është bërë e ditur se Osmani konfirmoi gatishmërinë e Kosovës për bashkëpunim të thellë me qeverinë e Kancelarit Merz.

‘’Osmani vlerësoi rolin jetik të Gjermanisë në mbrojtjen e vlerave demokratike, unitetit transatlantik dhe sigurisë evropiane. Presidentja Osmani nënvizoi se Gjermania ka qenë dhe mbetet shtyllë strategjike për Kosovën në ruajtjen e stabilitetit rajonal, si dhe avancimin e rrugës euroatlantike të Kosovës. Tutje, presidentja kërkoi mbështetjen e vazhdueshme të Berlinit për integrimit e plotë ndërkombëtar të Kosovë e në veçanti në Këshillin e Evropës, duke njohur rolin e Gjermanisë në këshill dhe rëndësinë e këtij procesi për forcimin e institucioneve demokratike dhe mbrojtjen e të drejtave të njeriut’’, thuhet në vazhdim

Në takim Osmani theksoi gjithashtu domosdoshmërinë e avancimit të Kosovës drejt anëtarësimit në NATO, duke elaboruar qartë kontributin që një e tillë do të kishte në garantimin e sigurisë dhe stabilitetit afatgjatë në rajon e Evropë.

Në lidhje me procesin e dialogut të ndërmjetësuar nga BE-ja, Osmani theksoi nevojën për qartësi strategjike, afate të përcaktuara dhe objektiva të qarta, duke theksuar se normalizimi nënkupton njohjen reciproke dhe respektimin e integritetit territorial e rendit kushtetues të Kosovës.

Osmani foli edhe për rëndësinë e largimit të plotë të masave të padrejta, duke theksuar që Gjermania mund të luajë rol të rëndësishëm në këtë drejtim./Indeksonline/