Osmani kujton avokatin Bajram Kelmendi dhe dy djemtë e tij, në 26-vjetorin e vrasjes së tyre

Presidentja e Kosovës, Vjosa Osmani, ka kujtuar avokatin e ndjerë, Bajram Kelmendin dhe dy djemtë e tij, Kastriotin dhe Kushtrimin.

Osmani ka shkruar se Kosova ka humbur një luftëtar të palëkundur të drejtësisë.

E para e vendit i kujton jo vetëm si viktima të një regjimi kriminal, por si simbole të qendresës, të idealeve për një Kosovë të lirë dhe demokratike.

“Njëzet e gjashtë vjet më parë, Kosova humbi një luftëtar të palëkundur të drejtësisë, avokatin Bajram Kelmendi dhe dy djemtë e tij, Kastriotin dhe Kushtrimin. Në orët më të errëta të historisë sonë, ata u rrëmbyen nga shtëpia e tyre nga regjimi gjenocidal i Millosheviqit dhe u ekzekutuan mizorisht. Ky akt barbarie synonte ta dekurajonte luftën tonë për liri. Por, dhuna nuk arriti ta shuante të vërtetën dhe krimet nuk e ndalën përpjekjen për drejtësi. Sot, ne nuk i kujtojmë vetëm si viktima të një regjimi kriminal, por si simbole të qëndresës, të idealeve për një Kosovë të lirë dhe demokratike.Jeta dhe sakrifica e Bajram Kelmendit është testament i guximit, ndërsa vrasja e tij dhe e djemve është kujtesë e përhershme për borxhin tonë ndaj drejtësisë. Në këtë përvjetor, riafirmojmë përkushtimin tonë të palëkundur: drejtësia për Bajram Kelmendin dhe bijtë e tij nuk do të mbetet vetëm një premtim, por një betim. Brezat që vijnë do të mësojnë për ta jo vetëm si viktima të një mizorie, por si flamurtarë të pathyeshëm të një populli që nuk u dorëzua kurrë”, ka shkruar Osmani./Indeksonline/