Osmani: Askush nuk mund ta negociojë integritetin dhe sovranitetin e Kosovës

Mbrëmë, Kuvendi i Kosovës ka miratuar rezolutën lidhur me dialogun me Serbinë, ku thuhet se Qeveria e Kosovës është institucioni që ka mandatin që të udhëheqë bisedimet politike me Serbinë.

Rezoluta u propozua nga dy partitë e koalicionit, LVV dhe LDK, dhe u votua në seancën e jashtëzakonshme të kuvendit të thirrur për buxhetin, pa praninë e opozitës, shkruan Indeksonline.

Kryeparlamentarja Vjosa Osmani tha se me rezolutën e miratuar askush nuk mund të të negociojë integritetin territorial, sovranitetin dhe rendin kushtetues të Republikës së Kosovës.

“Kushtetuta jonë ishte e qartë – por edhe tani – ky është vullneti politik i Parlamentit të Kosovës i shprehur në një votim mbrëmë. Dialogu me Republikën e Serbisë do të udhëhiqet nga Qeveria e Kosovës. Askush nuk mund të negociojë integritetin territorial, sovranitetin dhe rendin kushtetues të Republikës së Kosovës”, ka shkruar Osmani.

Shkrimit, i’a ka bashkangjitur edhe tekstin e rezolutës së miratuar, ku thuhet se “Sovraniteti shtetëror, integriteti territorial dhe karakteri shtetëror unitar i Republikës së Kosovës janë të pacenueshme. Askush nuk ka të drejtë të bisedojë, dialogojë apo negociojë për sovranitetin, integritetin territorial, rendin kushtetues dhe karakterin unitar të Kosovës”./Indeksonline/

Our Constitution was already clear -and now – so is the political will of the #Kosovo Parliament from a vote last night. The dialog with SRB shall be led by the Gov’t of Kosovo. No one shall be able to negotiate RKS territorial integrity, sovereignty and its constitutional order pic.twitter.com/DfXt6se4Mi

— Vjosa Osmani (@VjosaOsmaniMP) March 15, 2020