Pacientët mund të infektohen me dy lloje të Covid-19 në të njëjtën kohë

Sipas një studimi, dy pacientë në Brazil kanë rezultuar pozitivë për më shumë se një lloj të Covid-19, transmeton Indeksonline.

Shkencëtarët nga Universiteti Feevale studiuan 92 persona me koronavirus në Rio Grande do Sul, Brazili i Jugut. Pacientët ishin të moshës 14 deri 80 vjeç, ndërsa 50% ishin burra dhe 50% ishin gra.

Dy njerëz në studim dolën se ishin infektuar me dy lloje të ndryshme të virusit në nëntor 2020, raporton Metro.

Sidoqoftë, kombinimi i të dy llojeve nuk duket se e përkeqësoi sëmundjen dhe pacientët e kaluan sëmundjen lehtësisht. Ata janë shëruar që atëherë.

Fernando Spilki, studiues kryesor në Feevale, tha se fakti që dy njerëz rezultuan pozitivë për dy lloje në një madhësi kaq të vogël të mostrës tregon se fenomeni mund të mos jetë aq i rrallë.

Studiuesit gjithashtu zbuluan se ekzistonin pesë lloje të ndryshme që qarkullonin në shtetin e Rio Grande do Sul, duke përfshirë një të ri të quajtur VUI-NP13.

Profesori në Universitetin e Leicester, Dr Julian Tang, tha se nuk ishte ‘e pazakontë’ që dy lloje të një virusi të infektonin njëkohësisht një person.

Drejtori i Qendrës Botërore të Gripit në Institutin Francis Crick të Londrës, Dr John McCauley, ra dakord që ishte e mundur që një person të infektohet me dy lloje – ashtu si gripi./Indeksonline/