Pacolli: Arrestimi i Jovanovi­çit tregon që Serbia nuk i njeh parimet e qytetarisë

Ministri i Jashtëm i Kosovës, Behgjet Pacolli përmes një postimi në Facebook ka reaguar rreth arrestimit të Këshilltarit të Kryeministrit, Srdjan Jovanoviç nga autoritetet serbe.

Sipas Pacollit, ky arrestim tregon që Serbia nuk i njeh parimet themelore të qytetarisë, transmeton Indeksonline.

Tutje, ai shtoi se do t’i kërkoj Zyrës Ndërlidhëse të Republikës së Kosovës në Beograd që të monitoroj këtë rast.

Në fund ministri kosovar tha se është e qartë që mungon trysnia e BE-së mbi Serbinë.

Më poshtë mund të lexoni postimin e plotë të Behgjet Pacollit./Indeksonline/

Serbia po vazhdon me fushatën e terrorit mbi qytetarët e Republikës së Kosovës, duke i ndalur dhe keqtrajtuar në pika kufitare apo brenda territorit të saj. Arrestimi i sotshem i Këshilltarit të Kryeminstrit, Srdjan Jovanoviç, nga autoritetet e sigurisë dhe intelegjenca serbe, tregon që Serbia nuk njeh parimet themelore të qytetarisë. 

Ky regjim jo demokratik, i arreston serbet i Kosovës, sepse mendon që fakti se ata janë serbë, i bënë me automatizëm edhe shtetas të saj. Është pikërisht kjo logjike primitive, sipas së ciles serbet kudo në botë i takojnë Serbisë, ajo e cila e ka shtyrë këtë vend në luftra dhe konflikte me popuj dhe vendet tjera. 

Do t’i kërkojmë Zyrës Ndërlidhëse të Republikës së Kosovës në Beograd, të monitoroj këtë rast, dhe në rast se Jovanoviç keqtrajtohet, në shenjë proteste ndaj këtij shteti, do të shohim mundësinë e mbylljes sê përkohshme të prezencës sonë diplomatike në Serbi. 

Është e qartë që mungon trysnia nga Bashkimi Evropian mbi këtë vend, dhe edhe përkushtimi për procesin e normalizimit!