Pacolli: Vendimi i Qeverisë për masën ndaj Serbisë ishte unanim

Zëvendëskryeministri i Kosovës, Behgjet Pacolli ka thënë se vendimi i sotëm i Qeverisë së Kosovës që të rritet në 100 për qind masa ndaj Serbisë është në kuadër të përpjekjeve tona për të ndërtuar shtet të dinjitetshëm.

Duke thënë se ky vendim ishte unanim, përmes një postimi në Facebook, ai ka thënë se e njëjta masë vlen edhe për Bosnjen dhe Hercegovinën, e cila po vepron në sinkron me politikat e Serbisë sa i përket sjelljes ndaj Kosovës.

Ai ka uruar që kjo masë të mos ndikoj në rritjen e cmimve të produkteve elementare në Kosovë.

“Vendimi i sotëm i Qeverisë së Kosovës që masa prej 10% të rritet në 100% është në kuadër të përpjekjeve tona për të ndërtuar shtet të dinjitetshëm.

E njëjta masë vlen edhe për shtetin e Bosnjës dhe Hercegovinës, i cili po vepron në sinkron me politikat e Serbisë sa i përket sjelljes ndaj Kosovës.

Vendimi i sotëm nuk i është drejtuar popullit serb që jeton në Kosovë.

Uroj dhe shpresoj që kjo masë mos të ndikoj në rritjen e çmimeve të produkteve elementare në Kosovë, sepse nuk ka aryse. Ne do të jemi pran tregtarëve, prodhuesve dhe qytetarëve në mënyrë që gjithçka siç është paraparë në vendimin e qeverisë të zbatohet në praktikë.

Votimi i sotëm në mbledhjen e Qeverisë ishte unanim, ashtu siç është unik edhe koalicioni qeverisës”, ka shkruar ai.

Ndryshe, ky është një sqarim nga Pacolli pasi mediat serbe, duke iu referuar fotografisë së më poshtme kanë shkruar se ai nuk ka votuar në vendimin për vendosjen e taksës ndaj Serbisë./Indeksonline/