Parandalohet kontrabandë me mbi 1 ton speca në Kamenicë, policia jep detaje

Policia e Kosovës ka parandaluar një rast të kontrabandës me mallra në fshatin Lisockë të Komunës së Kamenicës, si rezultat i patrullimeve të rregullta të njësive të DRPK-Lindje.

Sipas njoftimit zyrtar, më 29 gusht është ndaluar një automjet me targa vendore, që drejtohej nga një person i dyshuar – mashkull kosovar. Gjatë kontrollit, në automjet janë gjetur 92 pako me speca, me peshë rreth 1000 kilogramë dhe vlerë tregu prej 2,500 deri në 3,000 euro.

Policia bën të ditur se i dyshuari nuk posedonte dokumentacion të vlefshëm për mallrat, dhe për këtë arsye është njoftuar prokurori kujdestar, i cili ka urdhëruar inicimin e rastit. Mallrat janë dorëzuar në pikën doganore përkatëse për procedura të mëtejshme.

Policia e Kosovës ka theksuar se mbetet e përkushtuar në luftimin e të gjitha formave të krimit, përfshirë kontrabandën me mallra, dhe ka falënderuar qytetarët për bashkëpunimin e vazhdueshëm./IndeksOnline/