Paraqitje e shkëlqyeshme e Arti Krasniqit, doli i katërti në LMR ”Patra 2019”

Notari Arti Krasniqi për pak nuk arriti ta fitonte medaljen e bronztë në lojërat mesdhetare në rërë ”Patra 2019”.

Notari ynë doli i katërti në disiplinën 5- kilometra në ujëra të hapur, nga 16 garues pjesëmarrës.

Koha e tij ishte 59 minuta e 49.10 sekonda, vetëm 22 sekonda më shumë se sa medalisti i bronztë, greku Georgios Arniakos. Dy vendet e para u takuan italianëve: Andrea Manzi (57.57.20) dhe Marcello Guidi (57.57.8).

“Kam dhënë maksimumin, normal që pasi dola I katërti, jam pak i zhgënjyer që për pak nuk dola i treti, por edhe kjo pozitë është shumë e mirë për mua. Jam i kënaqur me paraqitjen. Gara nuk ishte e lehtë për shkak të valëve që mbretëronin”, deklaroi Arti Krasniqi për “noc-kosovo.org”.

Gara e tij u ndoq nga drejtuesit e Komitetit Olimpik të Kosovës dhe të Federatës së Notit të Kosovës, të cilët po ashtu mbetën të kënaqur me paraqitjen e shkëlqyeshme të Artit, i cili dëshmoi se ka cilësi dhe të ardhme të ndritur.

Arti pak ditë më parë vendosi ta linte Gjermaninë për të përfaqësuar Kosovën.