Pas infektimit me Covid-19, kjo është gjendja e Cimës

Aktori i njohur i humorit, Rasim Thaçi-Cima ditë më parë u infektua me virusin Covid-19.

Aktori i famshëm po qëndron në Qendrën Klinike Universitare të Kosovës, ku edhe po trajtohet.

Pas gjendjes së rëndë me infektimin me koronavirusin, për aktorin u kërkuan mbi 50 antitrupa, nga vullnetarët e grupeve të gjakut A pozitiv dhe negativ, të cilët e kanë kaluar virusin.

Ishte e bija e tij dhe këngëtarja e njohur Adelina Thaçi, e cila kërkoi nga vullnetarët për dhurimin e plazmës, e cila pas pak orësh u sigurua.

Së fundi, vetë Adelina ka publikuar një fotografi nga QKUK-ja, ku shfaqet me maskë dhe doreza, teksa tregon për gjendjen e aktorit.

“Gjendja e babait ka përmirësime, por ai është ende në luftë sy më sy me Covidin. Unë po bëj apel, sepse me kalimin e kohës Covidi është forcuar, kurse kujdesi ynë është dobësuar. Duhet ta keni kujdesin maksimal, jo të prisni t’ju prekë të më të dashurit tuaj. Është bërë kohë e gjatë, disa kanë ende dilema e shumë herë po e neglizhoni, krejt jemi lodhur, por a keni vetëdije kur është fjala për jetë! Të gjithë atyre që janë në luftë, shërim sa më të shpejtë”, ka njoftuar këngëtarja.