Pas shfaqjes së arinjve në fshat, shkolla e Bellobradit kërkon masa sigurie nga policia

Shkolla “Sezai Surroi” në Bellobrad të Dragashit ka dërguar një kërkesë zyrtare drejt Policisë së Kosovës për marrjen e masave të menjëhershme të sigurisë pas paraqitjes së arinjve në këtë fshat.

Në kërkesën e publikuar në faqen zyrtare në Facebook, thuhet se prania e këtyre kafshëve të egra po paraqet rrezik serioz për nxënësit e kësaj shkolle, stafin arsimor, por edhe për të gjithë banorët e fshatit.

“Kërkesë për marrjen e masave të sigurisë lidhur me paraqitjen e arinjve në fshat. Në emër të SHFMU “SEZAI SURROI” Bellobrad, ju drejtohemi me këtë kërkesë që të merrni masa të menjëhershme sigurie për eliminimin ose largimin e arinjve që janë shfaqur në territorin e fshatit tonë. Prania e këtyre kafshëve të egra po paraqet rrezik serioz për nxënësit e shkollës sonë, për stafin arsimor si edhe për të gjithë banorët e fshatit, veçanërisht gjatë orëve të mëngjesit dhe pasdites kur nxënësit udhëtojnë drejt dhe nga shkolla”, thuhet në kërkesën drejtuar policisë, njofton Klankosova.tv.