Pas ushqimeve të shumta që keni ngrënë për festë, ‘lehtësoni’ trupin me këto ushqime
Përmes një planifikimi korrekt të vakteve, dieta vegane mund të jetë e shëndetshme dhe e ekuilibruar, duke përfshirë të gjitha substancat ushqyese për të cilat organizmi ka nevojë. Ndërkaq, mundet të jetë një mënyrë efikase për procesin e dezintoksikimit të trupit.
Dieta vegane është një formë e vegjetarianizmit që përjashton jo vetëm konsumin e mishit dhe të peshkut por edhe produktet derivate të kafshëve, pra, qumështin e nënproduktet, vezët, mjaltin…Bëhet fjalë për një regjim me bazë tërësisht vegjetale, megjithatë, e aftë të furnizojë trupin me elementët e rëndësishëm që përmbajnë ushqimet vegane si frutat dhe perimet e freskëta, drithërat integrale, bishtajorët, soja, farat e ndryshme, frutat e thata, algat, proteinat vegjetale (djathi tofu për shembull).
Nëse mendoni se duke përjashtuar mishin, vezët apo qumështin, kufizoni mundësitë për të alternuar pjatat, gaboheni. Nëse bëni planifikim korrekt, dieta vegane mund të jetë shumë më e shëndetshme se dietat e tjera dhe përveç humbjes së kilogramëve, do të ndikojë edhe në pastrimin e trupit nga toksina me origjinë shtazore.
Përveç kësaj, konsumi i një sasie të madhe perimesh dhe frutash biologjike, kontraston formimin e radikaleve të lira duke ushtruar një rol të rëndësishëm antioksidues.
Nëse, përgjithësisht, ata që i qasen kësaj filozofie ushqyese e bëjnë për zgjedhje etike, pra për mosshfrytëzim të qenieve të tjera të gjalla, po shtohen gjithnjë edhe veganët e tjerë me kohë të pjesshme që e zgjedhin këtë regjim për të pastruar organizmin.
E rëndësishme është të planifikoni
Të programosh në mënyrën e duhur një dietë vegane efikase, është mjaft e thjeshtë: duhet vetë të organizoheni duke blerë vetëm ato që ‘udhëzon’ dieta dhe që ju thamë më lart, pra, bishtajorë (fasule, thjerrëza, bizele etj; drithëra dhe të gjitha llojet e frutave e perimeve sado që ato të stinës janë gjithmonë më të mira).
Menu vegane
Për t’u furnizuar me minerale
Ushqime vegane të pasura me kalcium: Soia, djathi tofu, fara susami, fruta të thata sidomos kumbullat, fiqtë, rrushi dhe kajsia.
Ushqime vegane të pasura me hekur: drithëra integrale dhe miell integral, kuinoa, perime dhe sallata të ndryshme, brokoli, spinaq, fistikë, arra, lajthi, qiqra dhe bishtajorë të tjerë (nnë përgjithësi të gjithë)
Krem me finok dhe lulelakër
Përbërësit:
2 finok të mëdhenj të prerë në katër pjesë
1 lulelakër e vogël e pastruar dhe e prerë
4 lugë vaj ulliri
gjysmë qepe e pastruar dhe prerë
ujë nga zierja e perimeve
qumësht soje
piper të zi
kripë
fije të holla preshi ose panxhari për të përfunduar pjatën
Përgatitja:
Zieni në avull finokun dhe lulelakrën duke ruajtur ujin për ta përdorur më pas. Në një tigan me fund të ngushtë ose wok, ngrohni vajin në zjarr të fortë dhe kaurdisni qepën duke shtuar më pas perimet që zjetë. Lërini për pak minuta bashkë dhe më pas kalojini të gjitha në mikser. Ndërsa i fruloni, shtoni nga pak ujë dhe qumësht soje. Rregulloni sipas dëshirës shijen me kripë dhe piper dhe nëse nevojitet, ngroheni sërish. Shërbeni duke shtuar fije të grira hollë preshi ose panxhari.
Krekers me domate dhe spec
Përbërësit:
4 lugë fare lini të grira
150 ml ujë
2 karota të pastruara dhe të grira
1 kungull të prerë në kubikë
2 domate të thata dhe të prera
1 domate të freskët të pjekur e prerë në kubikë
1 thelb hudhër
1 lugë vaj ulliri
borzilok
kripë
Përgatitja:
Përzieni pluhurin e farave të linit me ujin dhe lëreni mënjanë. Në mikser, fruloni të gjitha perimet. Shtoni aty edhe masën e farave e më pas vajin, hudhrën, borzilokun dhe kripën për të vazhduar me rulimin deri sa të përftoni një masë të butë. Shpërndajeni të gjithën në mënyrë uniforme në letër kuzhine. Sa më e dendur të jetë masa aq më e vështirë do të jetë për t’u tharë prandaj hapja duhet të bëhet me kujdes në mënyrë që shtresa të thahet. Petën që hapët priteni në kuadrat. Tharja mund të kërkojë 12-14 orë por për këtë mund të përdorni edhe furrën në temperaturë jo më të lartë se 50 gradë.
