Pavarësia e Kosovës, Basha: Kjo ëndërr e bukur lirie, sot demokracia më e gjallë në rajon

Kryetari i Partisë Demokratike, Lulzim Basha ka uruar Pavarësinë e Kosovës, e cila sot shënon 14-vjetorin e saj.

Në një reagim në rrjetet sociale, kryedemokrati Basha shkruan se sot Kosova është një shtet me rrënjë të forta dhe institucione demokratike të konsoliduara.

“Gëzuar Pavarësinë Kosovë! Gëzuar këtë ditë fatlume shqiptarëve kudo në botë. Në përvjetorin e 14-të të shtetit të Kosovës, përulemi me nderim dhe mirënjohje para Presidentit Ibrahim Rugova, Komandantit Legjendar Adem Jashari, luftëtarëve të Ushtrisë Çlirimtare të Kosovës, veprimtarëve, patriotëve, bijëve dhe bijave të kombit tonë që kanë kryer sakrificën më sublime për pavarësinë.

Kjo ëndërr e bukur lirie, është sot demokracia më e gjallë e rajonit që, pavarësisht vështirësive, gëzon tashmë rrënjët e forta të një shteti me institucione të konsoliduara dhe stabilitet politik, i cili punon me vullnet dhe përkushtim të jashtëzakonshëm për integrimin euroatlantik.

Edhe në këto kohë sfiduese, jam krenar për arritjet e deritanishme dhe shpresëplotë për të ardhmen e Kosovës, me të cilën do të ecim vllazërisht përpara, drejt fatit tonë europian. Gëzuar Kosovë e dashur”, ka shkruar kryedemokrati Lulzim Basha.