Përfundon video-konferenca e klubeve italiane, ja vendimet e marra

Ka përfunduar video-konferenca e drejtuesve të 20 klubeve të Serisë A, të cilët kanë folur për situatën e krijuar nga ndërprerja e futbollit për shkak të përhapjes me shpejtësi të koronavirusit dhe mundësitë e rikthimit në fushën e stërvitjes.

Kështu është hedhur poshtë kërkesa e presidentit të Lazios Lotito, për të nisur menjëherë stërvitjen, të paktën klubet e qyteteve ku koronavirusi nuk është bërë ende shqetësues, duke qenë se klubet e tjera kanë kërkuar që rinisja e përgatitjeve të jetë në të njëjtën datë për të gjitha skuadrat.

Kështu në mbledhje është vendosur që nuk do të ketë stërvitje për asnjë skuadër, të paktën deri më datën 4 prill, për të respektuar maksimalisht edhe masat e qeverisë, ndërsa në vijim do të përcaktohet edhe në datë e saktë për rinisjen e përgatitjeve.

Nga ana tjetër është vendosur që të mendohet dhe konsultohet më gjerë e gjatë ndërprerja e pagave të futbollistëve, për periudhën që nuk po stërviten, pasi kështu klubet do të lehtësoheshin ndjeshëm nga ana financiare.