Përgjysmohet numri i turistëve në Shqipëri gjatë 2020

Pandemia ka futur në kolaps sektorin e turizmit në vend, ndësa shifrat tregojnë se numri i turistëve që vizituan Shqipërinë gjatë 11 muajve të parë të këtij viti nuk përbën as gjysmën e atyre të vitit të kaluar. Të dhënat e INSTAT-it tregojnë se deri tani, rreth 2.4 milionë turistë kanë hyrë në territorin shqiptar, nga 6.1 milionë që na vizituan më 2019.

Kufizimi i lëvizjeve dhe mbyllja e kufijve për shkak të pandemisë ka krijuar një situatë dramatike për turizmin ku numri i turistëve është përgjysmuar gjatë këtij viti.

Thënë më konkretisht, në 11 muajt e parë Shqipërinë e kanë vizituar 2.4 milionë persona, një rënie dërrmuese në raport me 2019-n, kur kishim mbi 6 milionë turistë. Në përqindje, zbritja qëndron në masën 59.5%.

Pavarësisht uljes së konsiderueshme, vendi ynë mbetet një destinacion i preferuar nga shqiptarët e Kosovës, ku 1.3 milionë prej tyre raportohet të kenë kaluar kufirin.

Edhe pse inkurajuese, shifra është reduktuar me 40.4% në raport me vitin që lamë pas.

Tkurrja më e ndjeshme është shënuar nga turistët spanjollë me 90.7%.

Në 11 mujorin e 2019-s rezultonin 28 mijë e 167 hyrje nga Spanja, ndërsa këtë vit numri ka rënë në 2 mijë e 613.

Pandemia ka pasur edhe një efekt të anasjelltë për turistët shqiptarë që udhëtojnë jashtë vendit.

Bllokimi i kufijve ka sjell një ulje të ndjeshme me rreth 53.5% të shtetasve shqiptarë dhe të huaj, që kanë dalë nga territori jonë krahasuar me të njëjtën periudhë.