Përmbyset autobusi në Brazil, të paktën 15 viktima

Pesëmbëdhjetë persona kanë humbur jetën pasi një autobus pasagjerësh u përmbys pas një aksidenti të rëndë në verilindje të Brazilit.

Sipas raportimit të The Guardian, autobusi po udhëtonte me rreth 30 pasagjerë kur doli nga rruga dhe u përmbys, duke shkaktuar të paktën 15 viktima.

Ngjarja ndodhi në qytetin Saloá, në shtetin Pernambuco, pasi automjeti ishte nisur nga shteti fqinj Bahia. Policia bëri të ditur se shoferi humbi kontrollin e autobusit, kaloi në korsinë e kundërt dhe u përplas me gurë në anë të rrugës, përpara se të përplasej në një argjinaturë me rërë, duke shkaktuar përmbysjen fatale të mjetit.

Autoritetet kanë nisur hetimet për shkaqet e aksidentit. Shoferi ka pësuar vetëm lëndime të lehta dhe ka rezultuar negativ në testin e alkoolit.

Guvernatori i shtetit të Bahias, Jerônimo Teixeira, reagoi në platformën “X”, duke shprehur ngushëllimet për viktimat dhe familjet e tyre.

“Po ndjek nga afër situatën me ekipin tim dhe ndjej dhimbje të thellë për humbjen e jetëve, për të plagosurit dhe për vuajtjet e familjeve”, shkroi ai.

Sipas Ministrisë braziliane të Transportit, më shumë se 10 mijë njerëz kanë humbur jetën në aksidente rrugore vetëm gjatë vitit 2024, duke theksuar problemin e vazhdueshëm të sigurisë në rrugët e vendit.

Ky nuk është incidenti i vetëm fatal i këtij viti. Në prill, 11 persona, përfshirë dy fëmijë, vdiqën pasi një autobus pasagjerësh u përmbys në juglindje të Brazilit, ndërsa në shkurt, një autobus me studentë u përplas me një kamion në shtetin São Paulo, duke vrarë 12 persona. Në shtator të vitit të kaluar, tre anëtarë të ekipit të futbollit amerikan Coritiba Crocodiles humbën jetën në një aksident të ngjashëm.