Plani ‘sekret’ i Bayernit për ta mbajtur Harry Kanen në Bundesligë

Bayern Munich po punon në një nga operacionet e tij më strategjike deri tani – sigurimin e të ardhmes afatgjatë të Harry Kane.

Megjithëse sulmuesi anglez po kalon një nga periudhat më të mira të karrierës së tij, qëndrimi i tij në Gjermani nuk është i garantuar plotësisht.

Megjithatë, në Mynih besojnë se ajo që ndodh jashtë fushës mund të jetë çelësi për ta mbajtur atë në klub.

Në moshën 32-vjeçare, Kane ka një klauzolë largimi e vlefshme deri në fund të janarit, e cila do t’i lejonte të largohej verën tjetër për rreth 65 milionë euro, pavarësisht se ka kontratë deri në vitin 2027.

Megjithatë, në Säbener Straße nuk ka panik. Sipas “Bild”, drejtuesit e Bayern besojnë se kanë një avantazh vendimtar në negociata – stabilitetin personal dhe familjar që sulmuesi ka gjetur në Bavari.

Përtej trofeve dhe kontratave, lidhja emocionale që Kane ka krijuar në Mynih mund të jetë ajo që siguron angazhimin e tij afatgjatë. Bayern e di se ai ndihet i vlerësuar, i dashur dhe i vendosur në Gjermani – gjëra që paratë nuk mund t’i blejnë.

Në një botë futbolli gjithnjë e më shumë të dominuar nga shifrat dhe klauzolat, paqja familjare dhe ndjenja e përkatësisë mund të jenë arma më e madhe e Bayern për të siguruar që Harry Kane të vazhdojë të shënojë gola me fanellën e kuqe për shumë vite të tjera./GazetaExpress/