Po mbahet “Parada e Krenarisë” në Prishtinë

Në Prishtinë, për herë të parë po mbahet “Parada e Krenarisë, e cila, sipas organizatorëve, ka për qëllim ngritjen e vetëdijes te qytetarët “për të treguar që komuniteti LGBTI, ashtu si edhe gjithë shoqëria mund të duan dhe të dashurojnë, si dhe largimin e paragjykimeve që shoqëria kosovare i ka për komunitetin”.

Kjo paradë, po mbahet pas tri marsheve të organizuara vitet e kaluara në të cilat, patën marrë pjesë edhe krerët shtetëror të Kosovës në mbështetje të komuniteti LGBTI.

Aktivitetet në mbështetje të këtij komuniteti kanë filluar që nga 6 tetori, raporton rel.

“Motoja e Javës së Krenarisë për këtë vit është, ‘Në emër të Dashnisë’”, thuhet në komunikatën e lëshuar për media nga organizatat që kanë marrë përsipër organizimin e paradës.

Në studimin e kryer nga National Democratic Institute- NDI “Hulumtimi i mendimit publik për komunitetin LGBTI në Ballkanin Perëndimor”, Kosova del të jetë vendi më homofobik në rajon, ku personat e këtij komuniteti janë të diskriminuar në të gjitha fushat e jetës.

Rrugëve të kryeqytetit të Kosovës po shihen edhe forca policore në shërbim të mbarëvajtjes dhe ecurisë së qetë të kësaj parade.