Po transferohej në gjyq, hidhet në det nga trageti i burgosuri

Një shtetas turk i burgosur u hodh në det, ndërsa po transportohej me traget nga burgu i Koridhalos drejt Mytilenes në Greqi.

Mediat greke bëjnë të ditur se i burgosuri po ruhej nga katër efektivë policie, kur u ngrit papritur nga dyshemeja ku po flinte, vrapoi dhe u hodh në det, duke i zënë në befasi shoqëruesit e tij. Incidenti ndodhi ndërsa anija ndodhej në ujërat midis ishujve Kiosit dhe Mytilen.

Policia njoftoi menjëherë kapitenin, i cili ndaloi anijen dhe filloi procedurat e kërkim-shpëtimit. Në të njëjtën kohë, u njoftua Roja Bregdetare, e cila mobilizoi anijet për të gjetur dhe shpëtuar të burgosurin.

Sipas mediave greke, i burgosuri u arrestua më 7 korrik 2025 nga Autoritetet Portale të Lesvosit për një rast kontrabande emigrantësh në ishull dhe u urdhërua ndalimi i tij i përkohshëm në Qendrën e Paraburgimit të Korydallos.

Transferimi i tij në Mytilene u krye me qëllim që të paraqitej para një autoriteti gjyqësor.