Policia apelon për kujdes, pas mesazheve mashtruese të shpërndara në emër të PK-së

Njëjtë si ditë më parë, lidhur me mesazhet mashtruese, Policia e Kosovës njofton sërish qytetarët se është identifikuar një SMS mashtrues që po shpërndahet në emër të Policisë së Kosovës, duke pretenduar rrejshëm se qytetarët kanë gjoba trafiku dhe duke kërkuar klikim në linqe për pagesë.

Nga PK-ja bëjnë me dije se ky mesazh nuk është zyrtar.

“Mos klikoni në linke të dyshimta. Mos jepni të dhëna bankare apo personale. Mos hapni faqe që kërkojnë pagesa përmes SMS-ve” deklaron Policia.

Në rast se pranoni mesazhe të tilla, qytetarët këshillohen që mesazhin ta fshijnë menjëherë, të raportojnë tek autoritetet përkatëse, si dhe të kontaktoni bankën nëse keni ndarë të dhëna.

“Raportoni përmes aplikacionit “Lajmëro Policinë” ose telefononi në 192. Qëndroni të kujdesshëm ndaj mashtrimeve online” deklaron PK-ja.