Policia e Kosovës apelon: T’i mbajmë fëmijët të sigurt në internet

Policia e Kosovës ka njoftuar se së fundi ka trajtuar disa raste shqetësuese, ku fëmijë kanë bërë postime në internet që lidhen me vetëlëndim dhe vetëvrasje. Falë bashkëpunimit me qytetarët dhe institucionet relevante, policia ka arritur të identifikojë fëmijët e rrezikuar dhe të sigurojë prezencën e tyre, ndërsa prindërit dhe mekanizmat përgjegjës janë njoftuar për trajtimin e duhur të rasteve.

Policia falënderon qytetarët dhe institucionet për bashkëpunimin, duke theksuar rëndësinë e krijimit të një ambienti sa më të sigurt në Internet, veçanërisht për fëmijët.

Me këtë rast, Policia e Kosovës apelon te prindërit që të monitorojnë aktivitetet online të fëmijëve të tyre dhe të flasin hapur me ta për rreziqet e internetit. Po ashtu, fëmijët këshillohen të kenë kujdes se me kë shoqërohen në rrjete sociale, çfarë postojnë dhe të mos ndajnë të dhëna personale me persona të panjohur.

Ndër këshillat kryesore të policisë janë:

Prindërit të kontrollojnë kohë pas kohe se çfarë bëjnë fëmijët në Internet.

Të shmangen lojërat e rrezikshme që nxisin vetëlëndim.

Fëmijët të mos takohen fizikisht me persona të panjohur nga Interneti pa dijeninë e prindërve.

Të mos shkarkohen ose shpërndahen materiale me përmbajtje të abuzimit të fëmijëve.

Të mos ngacmohen të tjerët në internet dhe të shmanget qëndrimi i gjatë e i panevojshëm online.

Policia kujton se në rast të çdo shqetësimi, fëmijët duhet të flasin menjëherë me prindërit, shokët ose të lajmërojnë policinë në çdo kohë.