Policia i rikthehet orarit 12- orësh për ta luftuar virusin korona

Ministri i Punëve të Brendshme, Agim Veliu, priti në takim drejtorin e përgjithshëm të Policisë së Kosovës, Rashit Qalaj, dhe drejtorin e Operativës, Afrim Ahmetaj.

Në këtë takim u diskutua për zhvillimet e fundit në vend, rritjen e numrit të qytetarëve të infektuar me Covid-19 si edhe për konsultimet dhe vendimet e fundit që u morën nga Qeveria e Republikës së Kosovës, lidhur me parandalimin e virusit, në veçanti për zbatimin dhe funksionalizimin sa më të mirë të planit të ri operacional të Policisë së Kosovës .

Gjithashtu, në këtë takim u vendos që Policia e Kosovës përsëri të kalojë në orarin 12-orësh, për të pasur nën kontroll të plotë situatën.

Policia e Kosovës, do të kujdeset që të shqiptojë dënime konform ligjit për të gjithë ata qytetarë që nuk i respektojnë masat.

Në fund të takimit Qalaj, e njoftoi ministrin Veliu se do t’i ftojë në takim të gjithë drejtorët rajonalë të Policisë së Kosovës për të diskutuar konsultimet dhe vendimet e sotme, si edhe të mirën masat e menjëhershme për parandalimin e kësaj pandemie për hir të ruajtjes së shëndetit publik.
Ministria e Punëve të Brendshme u bën thirrje të gjithë qytetarëve që të jenë së bashku në ndihmë të njëri-tjetrit, që të zbatohen udhëzimet e masat e Qeverisë e të profesionistëve shëndetësorë, në mënyrë që ta fitojmë luftën kundër virusit me sa më pak dëme./IndeksOnline/