Policia jep detaje për shoferin e Xhafajt: U vetëvra me tre plumba!

Policia e Shtetit, Prokuroria e Rrethit Gjyqësor në Tiranë dhe SHÇBA kanë lëshuar një deklaratë të përbashkët lidhur me vdekjen e gardistit 31-vjeçar Shkëlzen Qordja, që ishte shofer i Ministrit të Brendshëm të Shqipërisë, Fatmir Xhafaj.

Qordja u gjend në mëngjesin e sotëm i vdekur me plumb në kokë në makinën e Gardës, shkruajnë mediat shqiptare, transmeton Indeksonline.

Sipas njoftimit, viktima është vetëvrarë me armën e shërbimit dhe në vendin e ngjarjes janë gjetur 3 gëzhoja!

Ky është njoftimi i plotë:

Policia e Shtetit është njoftuar nga Garda e Republikës, rreth orës 09:30 të mëngjesit, se në garnizonin e Gardës, është gjetur i pajetë gardisti me detyrë funksionale shofer i Ministrit të Brendshëm, shtetasi Sh.Q., 31 vjeç.

Menjëherë është ngritur grupi hetimor, nën drejtimin e Prokurorit të Rrethit Gjyqësor Tiranë, me përbërje oficerë të Policisë Gjyqësore ekspertë mjeko-ligjorë, ekspertë të kriminalistikës dhe hetues të SHÇBA-së.

Nga veprimet e para hetimore rezulton se në mjetin e Gardës u gjet i pajetë, i ulur në sediljen e shoferit, punonjësi SH.Q.

Makina ishte e parkuar në garazhin e caktuar për mjetet e Ministrisë së Brendshme, i cili u gjet i mbyllur nga brenda.

Nga kqyrja rezultoi se në kokën e viktimës ka plagë tej shpuese të shkaktuar nga armë zjarri, me qitje me drejtim nga e djathta në të majtë.

Në vendngjarje u gjetën 3 gëzhoja të qitura nga arma automatike tip “MP5”, e cila ishte në dorën e djathtë të viktimës, me levën e ndërrimit të llojit të zjarrit, në pozicionin “qitje breshëri”.

Nga tërësia e veprimeve hetimore të kryera deri tani në vendin e ngjarjes, dyshohet se viktima është vetëvrarë, me armën e shërbimit.

I ndjeri, ka nisur punë në Gardës e Republikës në datën 29.03.2017 dhe nuk ka qenë asnjëherë subjekt procedimi, pezullimi apo mase tjetër disiplinore.

Grupi hetimor nën drejtimin e Prokurorisë së Rrethit Gjyqësor Tiranë është duke punuar për të qartësuar shkaqet e ngjarjes dhe zbardhjen e rrethanave. /Indeksonline/