Policia konfiskon një thes me monedha metalike false

Policia e Kosovës, gjatë zbatimit të një operacioni policor, në rrugën Prishtinë –Ferizaj, në hyrje te Prishtinës, ka ndaluar një veturë të dyshuar me targa vendore, në të cilën ishin katër persona.

Gjatë kontrollit atyre u janë gjetur një thes me monedha metalike franga zvicerane, monedha prej 5 (pesë) franga zvicerane – metalike dhe monedha prej 2 (dy) euro– metalike. Të njëjtat janë sekuestruar përkohësisht nën dyshimin se janë të falsifikuara.

Personat e dyshuar të cilët janë arrestuar janë:

· R.S. lindur me 1963, m/sh/k,

· A.S. lindur me 1975, m/sh/k,

· Y.B. lindur me 1983, m/sh/k dhe

· M.F. lindur me 1976, m/sh/k.

Sasia e monedhave të sekuestruara është:

1994 x 5 CHF, ku vlera nominale është 9970 franga zvicerane,
8 x2 EURO, ku vlera nominale është 16 euro dhe
vetura e përdorur në rast.

Policia, me urdhër të Gjykatësit të Procedurës Paraprake-Gjykata Themelore Prishtinë, ka kontrolluar 4 lokacione ku janë gjetur 2 (dy) armë – revole.

Me aktvendim të prokurorit të Prokurorisë Themelore Prishtinë, 4 (katër) të dyshuar, janë ndaluar për 48 orë në mbajtje./Indeksonline/