Policia në Gjilan gjobit një shofer, vetura inteligjente e kapi duke ngarë me 175 km/h në zonën ku kufizimi i shpejtësisë ishte 60 km/h

Policia në Gjilan ka njoftuar se ka shqiptuar një gjobë në vlerë prej 500 eurosh, pesë pikë negative dhe ndalim ngasjeje 6 muaj pasi një shofer ka ngarë me 175 km/h në zonën ku kufizimi i shpejtësisë është 60 km/h.

“Njësiti Rajonal i Komunikacionit Rrugor nga Drejtoria Rajonale e Policisë në Gjilan ka shqiptuar një gjobë në vlerë prej pesëqind (500) eurosh, pesë (5) pikë negative dhe masën e përkohshme të ndalim drejtimit të mjeteve motorike në afat prej gjashtë (6) muajsh ndaj kundërvajtësit, i cili përmes veturës me pajisje inteligjente është regjistruar duke ngarë veturën me shpejtësinë 175 km/h në zonën ku kufizimi i shpejtësisë me shenjë të trafikut është 60 km/h.”

Gjatë javës së fundit janë shqiptuar 11 gjoba.

“Po ashtu gjatë javës së fundit janë shqiptuar edhe njëmbëdhjetë (11) gjoba kundërvajtëse dhe masa e përkohshme të ndalim drejtimit të mjeteve motorike për njëmbëdhjetë (11) kundërvajtëse të cilët gjatë patrullimit me veturën me pajisje inteligjente janë hasur duke: tejkalim në vijë të plotë, tejkalim i shpejtësisë së kufizuar të lëvizjes e kundërvajtje të tjera të parapara me Ligjin për rregullat në trafikun rrugor. Me qëllim parandalimin e aksidenteve në trafik, Drejtoria Rajonale e Policisë në Gjilan apelon te të gjithë ngasësit që të respektojnë dispozitat ligjore në trafik, uleni shpejtësinë, mos përdorini telefonin gjatë ngasjes, vendosni rripin e sigurimit, keni kujdes ndaj këmbësorëve, mos e neglizhoni sinjalistikën rrugore dhe semaforët. Siguria në rrugë është përgjegjësi e përbashkët. Ndihmoni në uljen e aksidenteve dhe ruajtjen e jetës!”